Një sasi prej rreth një kilogram kokainë është kapur nga policia e Tiranës gjatë një operacioni anti-drogë të koduar “Three stars”.
Në pranga kanë përfunduar tre të rinj, shtetasit Robert Domi 30 vjeç, Andrea Dema 24 vjeç dhe Genis Mustafa, 27 vjeç, të cilëve gjatë kontrollit në mjetin me të cilin po lëviznin në rrugën “Vangjush Furrxhi”, iu gjet një pako me lëndë narkotike të llojit kokainë.
Nga verifikimet e kryera nga policia rezulton se këta shtetas, në bashkëpunim me njëri-tjetrin, siguronin lëndën narkotike dhe më pas e shpërndanin, në rrugën “Myslym Shyri”, në Rrugën e Durrësit dhe në zonën e 21-Dhjetorit.
Në cilësinë e provës materiale u sekuestruan 1 kg e 52 gramë lëndë e dyshuar narkotike kokainë, 4 aparate celulare, 1,400 euro dhe 78,900 lekë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme. /Shkruan Telegrafi/
