Prishtinë– Gjykata Themelore në Prishtinë të mërkurën ka shpallur aktgjykim dënues ndaj të akuzuarit për lëndim të rëndë trupor A.Z., pas arritjes së marrëveshjen për pranimin e fajsisë e lidhur në mes tij dhe Prokurorisë Themelore në Prishtinë. Ndaj të akuzuarit Z., u shqiptua dënim me burgim në kohëzgjatje prej 180 ditësh, ndërsa me pëlqimin e të pandehurit u zëvendësua me 4 mijë e 500 euro gjobë.

Shpalljen e aktgjykimit e ka bërë gjyqtari Bujar Ahmeti, raporton “Betimi për Drejtësi”.

I akuzuari Z., obligohet që për paushallin gjyqësor të paguaë shumën prej 20 euro, për ekspertizën mjekësore 20 euro dhe për Fondin e Kompensimit të Viktimave të Krimit shumën prej 20 euro. Të gjitha këto në afat prej 15 ditësh.

I dëmtuari A.D u udhëzua në kontest të rregullt juridiko-civil, ndërsa palët e pakënaqura me këtë vendim kanë të drejtë ankese sipas afatit ligjor.

Sipas aktakuzës së Prokurorisë Themelore në Prishtinë të ngritur më 18 shtator 2025 me marrëveshje mbi pranimin e fajësisë, i akuzuari A.Z., ngarkohej se më 23 maj 2025, deri sa ishte në Prishtinë së bashku me tani të dëmtuarit në orarin e punës për leximin e njehësorëve në rrugë e sipër, kishte lejuar që tani i dëmtuari A.D., të ulej mbi veturë në pjesën e përparme dhe kishte filluar të ngiste veturën për më shumë se 500-600 metra me një shpejtësi të pakonstatuar deri më tani.

Aty thuhet se edhe përkundër faktit se i dëmtuari ishte ulur mbi pjesën e përparme të veturës, i dyshuari kishte frenuar me vrull e si pasojë e këtij veprimi, i dëmtuari bie me kokë në asfalt, me ç’rast nga kjo rënie i dëmtuari A.D. ka marrë lëndime të rënda trupore.

Për këtë, A.Z., akuzohej se ka kryer veprën penale “Lëndim i rëndë trupor” nga neni 186, par.3, nënpar.3.1 të Kodit Penal të Republikës së Kosovës. /BetimipërDrejtësi/PortaliAlarm/