Liderja e opozitës venezueliane Maria Corina Machado, e shpallur fituese e Çmimit Nobel për Paqe 2025, nuk ishte e pranishme sot në ceremoninë zyrtare të dorëzimit të medaljes në Oslo.
Në emër të saj, medaljen dhe certifikatën e mori vajza e saj, Ana Corina Sosa Machado, gjatë ceremonisë së mbajtur në bashkinë e kryeqytetit norvegjez.

Ky zhvillim vjen pasi për javë të tëra kishte pasur pasiguri nëse Machado do të mund të udhëtonte e sigurt drejt Norvegjisë, për shkak të presioneve dhe rrezikut politik që ajo përballet në Venezuelë. Instituti Nobel njoftoi më herët gjatë ditës se ajo nuk do të merrte pjesë në ceremoni, megjithëse përmes një interviste të publikuar në platformën X, Machado konfirmoi se ishte rrugës për në Oslo, ndoshta duke mbërritur më vonë gjatë ditës, transmeton KultPlus.

Machado, 58 vjeçe, jeton aktualisht në fshehtësi dhe është një prej kundërshtareve më të zëshme të presidentit autoritar të Venezuelës, Nicolas Maduro. Prokuroria publike venezueliane ka paralajmëruar së fundmi se mund ta konsiderojë “të arratisur” nëse largohet nga vendi, për shkak të hetimeve të hapura kundër saj një lëvizje që mund ta ekspozojë ndaj arrestimit ose ndalimit të udhëtimit sapo të kthehet.

Komiteti Norvegjez i Nobelit e përzgjodhi Machadon për angazhimin e saj të palëkundur në mbrojtje të të drejtave demokratike të popullit venezuelian, të cilit ajo ia ka dedikuar edhe vetë çmimin.

Ceremonia e 10 dhjetorit shënon tradicionalisht përvjetorin e vdekjes së Alfred Nobelit, shpikësit suedez të dinamitit dhe themeluesit të çmimeve Nobel./KultPlus.com/PortaliAlarm/