Sot, më 2 dhjetor, liderët e tanishëm politikë të Kosovës dhe Shqipërisë kanë përkujtuar Presidentin historik Ibrahim Rugova, i lindur më 2 dhjetor 1944 dhe i ndarë nga jeta më 21 janar 2006. Rugova, i njohur si Ati Themeltar dhe ndonjëherë si “Gandhi i Ballkanit”, udhëhoqi rezistencën paqësore të Kosovës ndaj regjimit të ish-Jugosllavisë dhe krijoi një shtet paralel që siguronte shërbime arsimore dhe shëndetësore për shqiptarët gjatë viteve ’90. Ai themeloi Lidhjen Demokratike të Kosovës (LDK) në vitin 1989 dhe shërbeu si president i Kosovës nga 1992 deri në 2000, dhe më pas nga 2002 deri në vdekjen e tij në 2006.

Në këtë ditëlindje, liderët e sotëm kanë rikthyer vëmendjen tek trashëgimia e tij e pazëvendësueshme. Presidentja Vjosa Osmani e ka cilësuar Rugovën si “zërin e arsyes dhe vendosmërisë në kohë të errëta” dhe arkitekt të pavarësisë së Kosovës, duke e përshkruar atë si një udhërrëfyes që e ngriti çështjen e vendit “në majat e diplomacisë botërore”.

Behgjet Pacolli, ish-presidenti i Kosovës, e ka kujtuar Rugovën për fotografie të shkrepur para shumë dekadave, si një “simbol të mençurisë, durimit dhe paqes”, një figurë që “me qetësinë e tij të hekurt ndërtoi themelet e shtetësisë sonë” dhe frymëzim të përhershëm për ata që besojnë në vizion, urtësi dhe punë.

Ramush Haradinaj ndërkaq, kujtoi bashkëpunimin e tij me Rugovën në vitet e para të lirisë, duke theksuar rolin e tij në zhdukjen e ndasive të brendshme dhe mbështetjen ndaj drejtësisë ndërkombëtare: “Urime ditëlindja, President!, shkroi Haradinaj në rrjetin social Facebook.

Elisa Spiropali, tanimë Ministre e Punëve të Jashtme të Shqipërisë, e përshkroi Rugovën si një udhëheqës unik, që “turmat i udhëhiqte nëpër shtigje të panjohura, nga errësira drejt dritës” dhe një figurë që evokon “rrënjët e identitetit tonë dhe atë që duhet të jemi”.

Kjo ditëlindje rikthen kujtimin e një njeriu që me urtësi, qetësi dhe vizion i dha Kosovës drejtimin drejt lirisë dhe pavarësisë, duke e bërë emrin e tij një simbol të pandarë të historisë dhe aspiratave të kombit./PortaliAlarm/