Uragani Melissa goditi pjesën lindore të Kubës pranë qytetit Chivirico herët të mërkurën si një stuhi e kategorisë 3, pasi goditi ashpër Xhamajkën, si një nga uraganet më të fuqishme të Atlantikut të regjistruara ndonjëherë, tha Qendra Kombëtare e Uraganeve e SHBA-së.

Qindra mijëra njerëz janë evakuuar në strehimore në Kubë. Një paralajmërim uragani ishte në fuqi për provincat Granma, Santiago de Cuba, Guantanamo, Holguin dhe Las Tunas.

Herët të mërkurën, Melissa kishte erëra të qëndrueshme deri në 120 mph (193 km/h) dhe po lëvizte në verilindje me 10 mph (16 km/h), sipas Qendrës Kombëtare të Uraganeve në Miami. Uragani ishte i përqendruar 32 kilometra në lindje të Chivirico-s dhe rreth 97 kilometra në perëndim-jugperëndim të Guantanamos, Kubë.

Melissa parashikohej të kalonte mbi ishull gjatë mëngjesit dhe të zhvendosej drejt Bahamas më vonë të mërkurën. Shirat e vazhdueshëm dhe intensivë mund të shkaktojnë përmbytje kërcënuese për jetën me rrëshqitje të shumta dheu, thanë parashikuesit amerikanë. Për Bermudën ishte vendosur një vëzhgim uragani, raporton AP.

Melissa goditi Xhamajkën të martën me erëra të qëndrueshme deri në 185 mph (295 km/h).

Stuhia pritej të shkaktonte rritje të nivelit të detit deri në 3.6 metra dhe deri në 51 centimetra shi në disa zona të Kubës lindore.

“Rrëshqitje të shumta dheu ka gjasa të ndodhin në ato zona,” tha Michael Brennan, drejtor i Qendrës Kombëtare të Uraganeve në Miami.

Uragani mund të përkeqësojë krizën e rëndë ekonomike të Kubës, e cila tashmë ka shkaktuar ndërprerje të gjata të energjisë elektrike, mungesa të karburantit dhe ushqimit.

“Do të ketë shumë punë për të bërë. Ne e dimë se do të ketë shumë dëme,” tha Díaz-Canel në një adresim televiziv, ku siguroi se “askush nuk lihet pas dhe asnjë burim nuk kursehet për të mbrojtur jetën e popullatës”.

Njëkohësisht, ai u bëri thirrje qytetarëve të mos nënvlerësojnë fuqinë e Melissës, “më të fortës që ka goditur ndonjëherë vendin”.

Provincat nga Guantánamo, në skajin lindor, deri në Camagüey, pothuajse në qendër të Kubës, kishin pezulluar mësimin që të hënën.

Ndërsa Kuba po përgatitej për stuhinë, zyrtarët në Xhamajkë po përgatiteshin të dilnin në terren të mërkurën për të vlerësuar dëmet.

Dëme të mëdha u raportuan në pjesë të Clarendonit në jug të Xhamajkës dhe në qarkun jugperëndimor të Shën Elizabethës, i cili ishte “nën ujë”, tha Desmond McKenzie, zëvendëskryetar i Këshillit të Menaxhimit të Rreziqeve të Fatkeqësive të Xhamajkës.

Stuhia gjithashtu dëmtoi katër spitale dhe një prej tyre la pa energji elektrike, duke detyruar zyrtarët të evakuonin 75 pacientë, tha McKenzie.

Më shumë se gjysmë milioni abonentë mbetën pa energji elektrike të martën vonë, pasi zyrtarët raportuan se pjesa më e madhe e ishullit kishte pemë të rrëzuara, linja elektrike të shkëputura dhe përmbytje në shkallë të gjerë.

Qeveria tha se shpreson të rihapë të gjitha aeroportet e Xhamajkës që të enjten, për të siguruar shpërndarjen e shpejtë të ndihmave emergjente.

Stuhia ka shkaktuar tashmë për shtatë vdekje në Karaibe, përfshirë tre në Xhamajkë, tre në Haiti dhe një në Republikën Domenikane, ku edhe një person tjetër njoftohet se është i zhdukur./rtk/Alarm/